导语：
修改发表于2022年02月16号 10点 阅读 10203 评论2 点赞18 ©著作权归作者所有
文/红春
|
镇党建中心搞了一个征文活动。老朋友老顾看我有辰光辣报纸浪写点小文章，就邀请我对某小学三四年级小朋友个几篇作文进行点评。我觉着自家水平搭浆，推脱了几次，但耐勿住伊一遍遍帮我“汏脑子”，只好接受下来。
上：红春老师和老顾辣探讨点评工作
搿几篇作文侪是写自家爷爷嗰。一位李姓小朋友辣作文里讲，有年过年伊拉一家门人辣饭店吃年夜饭辰光，听到年近八十个爷爷讲起解放前头吃勿饱，穿勿暖个苦难生活，伊表示“要珍惜现在，更加努力学习，长大以后承担建设祖国个重任”。梁姓小朋友个爷爷是位邮电职工，伊听爷爷从老里八早互通书信讲起，讲到家家户户装电话、随身寻呼BP机、硕大笨重大哥大，一直到现在个智能手机，伊辣作文里拿阿拉国家通信事业个发展脉络写得有声有色。叶姓小朋友有一位“生辣旧社会，长辣红旗下”个爷爷，后来伊爷爷大学毕业，为了改变国家“一穷二白”个面貌，毅然决然奔赴内地，支援“三线”建设，克服重重困难，造出阿拉国家第一批军用汽车。
上：红春老师为梅陇中心小学学生讲自家当兵辰光个故事
搿几篇作文勿仅文笔流畅，层次分明，遣词造句准确，而且主题鲜明，对阿拉国家个建设发展充满自豪。 我想，搿几位小朋友能够拿自家爷爷个经历搭仔自家个体会写得介生动，搭仔伊拉经常“听爷爷讲故事”是分勿开嗰。 写好点评以后，我呒没“完成任务”个轻松，反而觉着交关惭愧。我同搿几个小朋友个爷爷年纪差勿多，经历虽然勿一样，但也有一肚皮个故事。巧个是我也有一个正辣读小学个“独养孙囡”，要是也让伊来写写我，一定会戆脱，因为我勿大对伊讲起自家老早个事体。我本来觉着伊个教育是伊爷娘搭仔学堂老师个事体，我作为爷爷，照顾好伊个生活，让伊吃饱穿暖就算尽到责任了。所以同搿点小朋友个爷爷比起来，我个关爱就显得邪气浅薄。 点评人家个文章，就算是小学生嗰，也是我难得个学习机会。搿点小朋友个爷爷用自家个经历来教育、引导后代，值得我学习。看来，我也要像搿几位爷爷一样，寻机会同孙囡讲讲自家个故事。讲讲我读初中辰光，是哪能每天放学步行一个多钟头走回屋里，只为省下乘公交个车钿，买零件装一台矿石收音机；讲讲我老早辣单位里全心全意做过个事体；讲讲我辣人生个转折点做过个抉择；还有我高中毕业做啥呒没参加高考就去参军…… 像我搿能年纪个老人，肚皮里故事是勿会少嗰，讲好自家个故事，也是阿拉搿点老人个义务搭仔责任。
上：红春老师为同学们讲党史
|
信纸作者：梅陇夕阳红
请选择你想添加的收藏夹
