回味姆妈烧格“泡饭”（沪语版）

小草

    泡饭，对上海宁来讲是家家人家才晓得格，人人会烧格一道“美食”。用隔夜格冷饭头，放了了得得滚格开水里滚一滚，随后用筷子“调一调”，特别是大冷天，喝上一碗薄溜溜、热腾腾格泡饭，真格不要太“惬意”哦。

    记得小格辰光，姆妈阿爸每天起早贪黑为了阿拉兄弟姐妹吃了伐少苦，每天早浪厢阿拉就像一群嗷嗷待哺额“小鸡小鸭”，围牢姆妈笃笃转、头头转，因为姆妈还要赶去上班，根本就妩没辰光烧早饭，所以姆妈就隔夜头里多烧点饭，第二天早浪厢烧一锅开水放入冷饭头，然后用筷子把冷饭打散，烧到泡泡漫上来，再稍微闷额三五分钟就好了，随后配上一盆萧山萝卜干就是阿拉额早饭。记得有一天姆妈发工资，还急吼吼奔到楼下买了两根油条，姆妈用剪刀把油条剪成一段一段额，倒上一点点鲜酱油让阿拉过泡饭，格辰光格个咪道不要太好吃哦，直到今朝，偶尔我还会烧点泡饭买根油条，回味一下小晨光“姆妈的咪道”。

    现在交关上海宁，特别是上了一点年纪的人，早浪厢还是习惯烧点泡饭吃吃，清爽！但也有些年轻人因为夜里困的暗，早浪厢爬伐起，于是就到附近额餐饮店里吃碗菌菇菜泡饭，或者来碗海鲜泡饭等，便当呀。今朝与泡饭搭档额不局限于以前额鲜酱油沾油条了，而是多了许多配阿拉上海宁胃口额开胃菜，有皮蛋、咸蛋、花生米、酱菜、乳腐、萝卜条，特别到了夏天，弄条咸香鱼蒸肉糜，高头再敲两只咸蛋，格味道嗲得来要多吃一碗泡饭，有辰光自己还会调侃自己，递能吃下去胃要比肚皮大勒。

    现在吃泡饭伐仅仅是为了便当，为了省点钞票，更多额伊似乎已经成为上海宁的饮食习惯了，记得有一次到妹妹屋里去，一台子额冷菜热炒，妹妹忙得来汗哒哒地，后来大家提议，以后碰头吃得简单点，我接着话题脱口而出，下次碰头阿拉烧点泡饭吃吃好伐？妩没想到大家搭之我额想法惊人额一致，妹妹们七嘴八舌， 好额呀，泡饭好吃，弄点香槽鸭胗干、干煎咸带鱼、苔条花生米，还妩没等妹妹讲完，我又迫不及待的说还有黄泥螺、蟹湖、鳗香勒。

    盛上一碗泡饭，台子浪厢过泡饭额菜让我食欲大开，花生米的香味、蟹湖的鲜味、还有咯吱咯吱香脆的萝卜干让我吃得停不下来，一只只诱人的美味绑架了一碗碗清香的泡饭，最后还是妹妹提醒我说，阿姐，侬吃了几碗泡饭啦，我说伐晓得呀，话音刚落，妹妹们已经笑得“人仰马翻”，因为伊拉晓得我胃口伐大，妩没想到今朝我吃介许多泡饭。

    泡饭，是我额“美食”，隔三差五伐烧点泡饭吃吃就郭着难过，因为泡饭里装满了小晨光额记忆、泡饭是我生活额“伴侣”，无论走到啥地方，都永远隐藏着“姆妈额味道”。

（以上图片均来自网络）

(注：您的设备不支持flash)