来源：新民晚报 作者：朱少伟

核心提示：等大家忙好坐下来，望着台子浪向黄澄澄个面拖蟹搭红彤彤个煠蟹，还有油亮个炒螺蛳、香喷喷个咸瓜末炒菱角、像牛奶个蚌肉汤，侪胃口大开。阿金伯打开一小甏自家做个崇明老白酒，拨每个人倒了一杯，于是大家举杯共同祝福伟大祖国繁荣昌盛！畅饮着甘醇个崇明老白酒，品尝着别有风味个菜，大家个笑声一串串飞出茅草棚……

上山下乡时的乐曲 资料图

本文摘自《新民晚报》2013年9月29日刊  作者：朱少伟 原题为：当年垃农场过国庆节

垃拉上世纪七十年代中期，我中学毕业“上山下乡”去崇明农场。迎着春风到仔连队，对搿面个一切侪觉着新鲜。但过了几个月，就开始叫苦：平常个日脚垃田里做生活，来得个吃力；场休个辰光交关厌气，呒没趣味！还好，老农（知青勿谙农事，每个生产连队侪派有一个老农做顾问，相当于现在个技术总监）阿金伯夜里向一直到宿舍来，讲当地个各种笑话，大家听得邪气扎劲。

眼睛一眨，就到了国庆节前夕。搿日夜里向，阿金伯跑进宿舍对大家讲：“我决定跟一道欢度国庆节，多烧几只好吃个小菜，特别是蟹咾啥，喝趟崇明老白酒！”宿舍里八个人一听，侪拍手表示赞成。不过，大家马上就想到：阿拉每个月工钿只有十八块，拿钞票一记头侪用光，后头个日脚哪能过呢？阿金伯像煞晓得大家个心思，又补充几句：“东头个稻田提早成熟了，明朝早浪向跟我拿伊收割脱，就能弄到蟹；另外，大家只要再动动手，还可以‘变’出老多物事！”阿拉虽然有眼奇怪，但侪相信阿金伯肯定勿会得吹牛皮。

第二天早浪向，大家到连队饭堂吃过早饭，就跟阿金伯来到东头个稻田。按照阿金伯个指点，阿拉两个人一组从四边往稻田当中割。我勿大理解：“割稻一般侪是大家垃同一边挥动镰刀个，今朝哪能搞成迭种腔调？”因为阿金伯是公认个做田里生活个“权威”，我勿敢发声音，只好埋头挥动镰刀。快包抄到稻田当中个辰光，垃四边流动帮忙个阿金伯开了口：“搿歇，每边一个人继续割，另外一个人立辣海寻蟹！”我正有眼糊涂，突然发现脚下头有只蟹慢慢爬行，伊吐着白沫，挥着螯钳，摆出要“决一死战”个架势。迭个辰光，其他人也发出惊喜个叫声。到最后几棵水稻割倒脱，大家已经抓着四十多只蟹。阿金伯笑哈哈讲出秘密：迭片稻田一面贴牢河浜，一面是条沟，田埂浪布满蟹洞，蟹欢喜垃下半夜爬出来，到稻田里觅食；阿拉刚刚突然从四边进逼，伊拉只好侪朝当中逃，最后走投无路就成了“俘虏”。

阿拉围着装得满满个竹篓，正垃观察大大小小个蟹，阿金伯关照：“走，到旁边个河浜里摸蚌搭螺蛳。这种生活蛮便当，只要沿着河岸用双手朝水底摸就可以了。”果然，大家一歇歇就摸到半篮老壮个青壳螺蛳，还有勿少蚌。接下来，阿金伯用小船拿大家撑到河浜当中，贴近一片绿油油个藤蔓，摘到了老多野菱。

快中午个辰光，阿拉带着自家动手准备个物事，走进了阿金伯个茅草棚。大家七手八脚忙起来，有个汏蟹，有个挖蚌肉，有个剪螺蛳屁股，有个剥野菱，真是开心得勿得了。

等大家忙好坐下来，望着台子浪向黄澄澄个面拖蟹搭红彤彤个煠蟹，还有油亮个炒螺蛳、香喷喷个咸瓜末炒菱角、像牛奶个蚌肉汤，侪胃口大开。阿金伯打开一小甏自家做个崇明老白酒，拨每个人倒了一杯，于是大家举杯共同祝福伟大祖国繁荣昌盛！畅饮着甘醇个崇明老白酒，品尝着别有风味个菜，大家个笑声一串串飞出茅草棚……

(注：您的设备不支持flash)